پاکستان ہاکی فیڈریشن نے بھارت میں ہونے والی کامن ویلتھ گیمزاور چین میں ایشین گیمز کے لیے قومی ہاکی ٹیم کے تربیتی کیمپس کے شیڈول کا اعلان کر دیا ہے۔

شیڈول کا اعلان پاکستان ہاکی فیڈریشن کے ہیڈ کوارٹرزنیشنل ہاکی سٹیڈیم لاہور سے جاری ہونے والی ایک پریس ریلیزمیں کیا گیا۔ شیڈول کے مطابق پہلے مرحلے میں قومی ہاکی ٹیم کا تربیتی کیمپ بارہ سے چھبیس اگست تک ایبٹ آباد میں منعقد ہوگا جبکہ دوسرے مرحلے میں ٹیم یکم سے بیس ستمبر تک ہالینڈ میں پریکٹس کرے گی۔ اس کے بعد قومی ٹیم تین اکتوبر سے بھارتی دارالحکومت نئی دہلی میں شروع ہونے والے دولت مشترکہ کھیلوں میں شرکت کے لئے انتیس ستمبرکو بھارت روانہ ہوگی۔ اس ایونٹ کے بعد کھلاڑیوں کوایک ہفتے کا آرام دیا جائے گا جبکہ نومبرمیں چین میں ہونے والے ایشین گیمز کے لئے چوبیس اکتوبر سے لاہورمیں تربیتی کیمپ کا آغازہو گا جوایشین گیمز کے لیے ٹیم کی روانگی تک جاری رہے گا۔