حنا ربانی سے ملاقات کے بعد علی گیلانی سرینگر ائرپورٹ پر گرفتار

سرینگر (کے پی آئی) حریت کانفرنس (گ) کے چیئرمین سید علی گیلانی کو نئی دہلی سے لوٹنے کے فوراً بعد سرینگر ائر پورٹ پر گرفتار کر کے گھر پر نظربند کردےا گےا۔ پاکستانی وزیر خارجہ حنا ربانی کھر کے ساتھ ملاقات کے بعد جونہی گیلانی دہلی سے سرینگر ائرپورٹ پہنچے تو ائرپورٹ کے اندرونی دروازے پر ہی پولیس کی ایک ٹیم موجود تھی جس نے انہیں گرفتار کرتے ہوئے پولیس گاڑی میں سوار کیا۔ اس موقع پر گیلانی نے اپنی ذاتی گاڑی میں پولیس کے ساتھ جانے پر اصرار کیا تاہم پولیس نے اس کی اجازت نہیں دی اور انہیں اپنی گاڑی میں سوار کرکے حیدر پورہ پہنچایا۔ حریت (گ) نے پولیس کی اس کارروائی کی مذمت کی ہے۔