ہمارا فرض ۔۔ ہمارا قرض

پانیوں میں قیام ہے جن کا
کھانا پینا تمام ہے جن کا
ان کے بارے میں سوچ وقت سحر
اپنے ہاتھوں میں لے کے لقمہ تر
بھوکے بیٹھے ہیں جن کے لخت جگر
اور نظریں جمی ہیں پانی پر
چلو بھر جس کو پی نہیں سکتے
کیا کریں پیاسے جی نہیں سکتے
سوچ ان کے لئے دم افطار
لے کے ہاتھوں میں شربت عطار
ان کے بارے میں سوچ میرے یار
ایسے میں کون ان کا ہے غمخوار
بھیج دے آدھی سحری‘ افطاری
رقم معمولی ہے‘ نہیں بھاری
کریں ایثار سارے روزہ دار
اور جن کو ہے روزہ رکھنا‘ بار
ماہ صیام میں کمائیں ثواب
تاکہ وہ حشر میں نہ پائیں عذاب
عید فطرانہ اور مال زکوٰة
جس پر ہو اعتبار اسکے ہاتھ
بھیج دیں اپنے بھائیوں کے لئے
کچھ غذا اور دوائیوں کے لئے
ہم کو یہ فرض ہے ادا کرنا
گویا اک قرض ہے ادا کرنا