اب تو کوئی اچھی روائت؟

بدل دو اب یہ اندازِ حکومت
کرو رائج کوئی اچھی روائت
پنپنے دو یہاں جمہوریت کو
کسی بھی آمرانہ شخصیت کو
نہ موقع دو کہ وہ آکر اچانک
نظامِ ملک کو کردے بھیانک
سیاست داں بھی اپنے طور بدلیں
جو کچھ بہتر ہیں خود کو اور بدلیں
کریں سب فیصلے ایواں کے اندر
یہاں آئین ہو بالا وبرتر
بڑا کردار ہی پائے بڑائی
ہو حاصل نیک دل کی رہنمائی
کرو اب ختم سڑکوں پر لڑائی
نہ ہو دنیا میں اپنی جگ ہنسائی
سبق ماضی سے کچھ تو آج سیکھیں
کیا جاتا ہے کیسے راج سیکھیں
کہ فردا ہو ہمارا پھر حسیں تر
نئی نسلوں کا بھی بدلے مقدر
اگر باہم یونہی لڑتے رہے ہم
تو پھر امید بہتر کل کی ہے کم
خدارا باز آئو کچھ تو سوچو
گریباں ایک دوجے کا نہ نوچو