جناب صدر ۔۔ پوری طاقت؟

ہوں قوانین جو رائج اچھے
سامنے آئیں نتائج اچھے
ملک کے صدر کی ذمہ داری
صرف اعلان نہیں سرکاری
ملکی معاملات پہ وہ رکھیں نظر
تھوڑا ساریل میں بھی کریں سفر
عام انسان کا جینا دیکھیں
خون کو بنتا پسینہ دیکھیں
سمجھیں مزدور کا دہقان کا دکھ
جس کو ملتا نہیں کوئی بھی سکھ
جن کا سیلاب میں اسباب بہا
ان میں اکثر کو نہیں کچھ بھی ملا
جابجا پھرتے ہیں دھکے کھاتے
کوئی گھر ہوتا تو گھر کو جاتے
ہے کہاں صدر کی پوری طاقت؟
اس طرح ہوتی ہے قومی خدمت؟
آپ آگاہ بھی ہیں مشکل سے
کرنا بھی چاہتے ہیں کچھ دل سے
آپ کے سینے میں ہے دل بھی بڑا
پھر بھی یہ ملک ہے دلدل میں گڑا
کچھ نہیں کرتے وزیراعظم
ناک میں آیا معیشت کا دم
کس طرح ہو گی بھلا مستحکم؟
حکمراں سب جو لڑیں گے باہم
صدر اب اپنی دکھائیں طاقت
لائیں اس ملک میں اپنی دولت
جیب میں نوٹ ہیں پھر کیوں چھاپیں
آگ ہم اپنی ہی کیوں نہ تاپیں؟
ملک امریکہ کا محتاج نہ ہو
یہاں ”اوباما“ مہاراج نہ ہو
وہ بھی زرداری کی طاقت دیکھے
ایک مضبوط حکومت دیکھے