خیبرپختونخوا کے وزیراطلاعات میاں افتخارحسین نے کہا ہے کہ بدترین سیلاب سے صوبے کا پچانوے فیصد حصہ متاثر ہوا ہے، امدادی ادارے نقصانات کو مدنظر رکھ کرامداد دیں

میاں افتخارحسین نے یہ بات پشاور میں پریس بریفنگ کے دوران کہی۔ انہوں نے کہا کہ سیلاب سے خیبر پختونخوا میں آٹھ سو سنتالیس افراد جاں بحق اور آٹھ سو بتیس زخمی ہوئے ہیں۔ سات لاکھ بیس ہزار چھ سو آٹھ افراد بے گھر جبکہ چار سو سے زائد دیہات زیر آب آنے سے پانچ لاکھ نوے ہزار خاندان متاثر ہوئے ہیں۔ میاں افتخار حسین کا کہنا تھا کہ سیلاب سے ایک لاکھ سے زائد گھر مکمل طور پر تباہ جبکہ چھپن ہزار کو جزوی نقصان پہنچا ہے۔ صوبائی وزیر اطلاعات نے کہا کہ جب تک عوام امدادی کاموں سے مطمئن نہیں ہونگے حکومت بھی مطمئن نہیں ہوسکتی۔ ایک سوال کے جواب میں انہوں نے کہا کہ سعودی عرب  نے صوبہ میں سیلاب متاثرین کیلئے خیمے بھیجے ہیں،باقی کسی اسلامی ملک نے امداد نہیں دی۔