بھارت نے پاکستان کے سیلاب زدگان  کے لیے مزید دو کروڑ ڈالر امداد دینے کا اعلان کیا ہے۔

بھارتی وزیر خارجہ ایس ایم کرشنا نے لوک سبھا میں خطاب کرتے ہوئے بتایا کہ ان کی حکومت کی جانب سے پہلے پچاس لاکھ ڈالر امداد کا اعلان کیا گیا تھا جبکہ اب مزید دو کروڑ ڈالر فراہم کیے جائیں گے ۔ یہ امداد اقوام متحدہ کے ذریعے پاکستان میں متاثرین سیلاب تک پہنچائی جائے گی  کیونکہ پاکستان نے بھارت سے براہ راست امداد قبول کرنے سے انکار کر دیا تھا ۔ بھارتی وزیر خارجہ کا کہنا تھا کہ  پچاس لاکھ ڈالر ورلڈ فوڈ پروگرام جبکہ دو کروڑ ڈالر اقوام متحدہ کے بحالی پروگرام کے لیے فراہم کیے جا رہے ہیں ۔