صدام نے خطرناک ہتھیاروں کا پروپیگنڈہ ایران کو ڈرانے کیلئے کیا تھا: ایف بی آئی

واشنگٹن (اے پی پی) ایف بی آئی نے دعویٰ کیا ہے کہ سابق صدر صدام حسین نے اپنی پھانسی سے قبل ایف بی آئی کو آگاہ کیا تھا کہ اس نے ملک میں بڑے پیمانے پر تباہی پھیلانے والے ہتھیاروں کی موجودگی کے بارے میں پروپیگنڈہ ایران کو ڈرانے دھمکانے کیلئے کیا تھا۔ اس بات کا انکشاف امریکی قومی سلامتی آرکائیو کی طرف سے جاری دستاویزات میں کیا گیا جس میں ایف بی آئی کی صدام حسین سے بات چیت کے چند مندرجات شامل ہیں۔ دستاویزات کے مطابق ایف بی آئی کے خصوصی ایجنٹ جارج پالرو کی طرف سے 2003ء میں گرفتاری کے بعد کی جانے والی بات چیت میں صدام حسین نے خصوصی ایجنٹ کو آگاہ کیا کہ وہ ایران کو عراق کیلئے بہت خطرہ سمجھتے تھے۔ وہ نہیں چاہتے تھے ایران عراق کو ایک کمزور ملک سمجھے۔ صدام حسین نے القاعدہ کے ساتھ کسی بھی قسم کے روابط سے بھی انکار کیا تھا۔ انہوں نے کہا کہ میں نے کبھی القاعدہ کے رہنما اسامہ بن لادن سے ملاقات نہیں کی۔