ایشین ورلڈ انٹرٹینمنٹ کے پہلے پاک ٹیلی ایوارڈز کی تقریب ملتوی

لاہور (کلچرل رپورٹر) ایشین ورلڈ انٹرٹینمنٹ کے پہلے پاک ٹیلی ایوارڈز کی تقریب جو 3 مارچ کو مقامی کلب میں منعقد ہونا تھی، ملتوی کر دی گئی ہے۔ اب یہ تقریب 29 مارچ کو منعقد ہو گی۔ ایشین ورلڈ انٹرٹینمنٹ کے چیئرمین رانا خالد محمود نے کہا ہے کہ ہم نے تقریباً ایک ماہ پہلے تمام ٹی وی چینلز کی انتظامیہ سے درخواست کی تھی کہ وہ اپنے اپنے بہترین ڈرامے کو ایوارڈز کی نامزدگی کے لئے ایوارڈز انتظامیہ کو فراہم کریں لیکن ابھی تک بہت تھوڑے چینلز نے اپنے ڈرامے بھیجے ہیں جس کی وجہ سے جیوری کو فیصلہ کرنے میں دشواری کا سامنا ہے۔ تقریب کو شایان شان منعقد کرنے کے لئے اسے 29 مارچ تک ملتوی کر دیا گیا ہے تاہم ایوارڈز تقریب کی ریہرسلز جاری رہیں گی۔