نیٹو کے سربراہ اینڈرز فوگ راسموسین نےکابل میں میڈیا سےگفتگوکرتے ہوئے کہا کہ کہ انہیں پہلے یقین تھا کہ پاکستان کے ایٹمی اثاثےمحفوظ ہیں اور ان کی حفاظت کو یقینی بنایا گیا ہے۔ کراچی میں نیول بیس پر دہشتگردوں کے حملے اور ایبٹ آباد میں اسامہ بن لادن کی موجودگی کے بعد اب جوہری اثاثوں کی حفاظت کے حوالے سے کئی سوال اٹھ رہے ہیں۔ انہوں نے کہا کہ وہ موجودہ صورتحال کا قریب سے جائزہ لے رہے ہیں۔ راسموسین ایک روزہ دورے پر کابل میں موجود ہیں جہاں انہوں نے افغان صدر سے ملاقات بھی کی۔

جاپان میں ایک تقریب سے خطاب کرتے ہوئےجنرل اینڈرس کا کہنا تھا کہ افغانستان اور بالخصوص خطے میں طویل المیعاد امن کیلئے پاکستان کامثبت تعاون ضروری ہے۔ ہم چاہتے ہیں کہ پاکستان اور بھارت کشیدگی کم کریں تاکہ تعمیری مذاکرات کا سلسلہ شروع ہوسکے۔ لیبیا کے حوالے سے انھوں نے کہا کہ وہاں حزب اختلاف کی جمہوری قوتیں اورعالمی سیاسی حمایت بالا آخر کرنل قذافی کو اقتدار چھوڑنے پر مجبور کردے گی۔ نو فلائی زون اور اس قسم کے تمام اقدامات لیبیا کے عوام کی حفاظت کے لئے کیے جارہے ہیں۔

امریکی شہر اٹلانٹا میں ورلڈ افیئرزکونسل سےخطاب کرتے ہوئے راسموسین نے کہا عالمی برادری کے پاس پاکستان کی مدد کے سوا کوئی راستہ نہیں۔اسامہ کی پاکستان میں موجودگی کے باوجود مغربی ممالک شدت پسندوں کے خاتمے کے لیے پاکستان کی مدد کریں۔ انہوں نے پاک افغان بارڈر پر دہشتگردی کے خلاف جنگ میں پاکستانی فوج کے کردار کو سراہا۔ راسموسین کا کہنا تھا عالمی برادری کو ان پاکستانیوں کی مدد کرنی چاہئیے جو دہشتگردوں اور شدت پسندوں کے خلاف سرگرم ہیں۔