فورتھ شیڈول میں شامل افراد کے شناختی کارڈ‘ پاسپورٹ بحال کرنیکا کا فیصلہ‘ دینی قوتوں کو نشانہ نہیں بنانے دینگے: نثار
اسلام آباد+لاہور ( نوائے وقت رپورٹ+خصوصی نامہ نگار ) وزیر داخلہ چودھری نثار سے دفاع پاکستان کونسل کے رہنماؤں نے ملاقات کی جس کے بعد شیڈول فورتھ میں شامل افراد کے بلاک کئے شناختی کارڈ بحال کرنے کا فیصلہ کیا گیا۔ ملاقات میں سکیورٹی سمیت مجموعی ملکی صورتحال پر تبادلہ خیال کیا گیا۔ ان افراد کی شہریت بھی عارضی طور پر منسوخ کر دی گئی تھی۔ بلاک کئے گئے پاسپورٹ بھی فوری طور پر بحال کئے جائیں گے۔ صوبائی سطح پر شیڈول فورتھ کی لسٹوں کا بھی ازسرنو جائزہ لیا جائے گا۔ نادرا کی طرف سے لگ بھگ 2 ہزار شناختی کارڈ بلاک کئے گئے۔ وزیر داخلہ نے کہا ہے کہ تمام صوبوں کو شیڈول فور کی لسٹوں کا دوبارہ جائزہ لینے کا کہا جائے گا۔ دنیا کی کوئی طاقت دین کو پاکستان سے الگ نہیں کر سکتی۔ پاکستان اسلامی نظرئیے پر قائم ہوا اور قائم دائم رہے گا۔ شیڈول فور میں شامل تمام شخصیات پاکستانی ہیں انہیں شناختی کارڈ سے کیسے محروم کیا جا سکتا ہے۔ آئندہ اس قسم کے فیصلوں سے مکمل اجتناب کیا جائے۔ سکیورٹی کی بحالی میں دینی قوتوں نے کلیدی کردار ادا کیا ہے۔ دینی قوتوں کو کسی صورت نشانہ بنانے کی اجازت نہیں دیں گے۔ تمام صوبائی حکومتوں سے مل کر دینی حلقوں کے تحفظات دور کریں گے۔ وفد نے کہا کہ اسلام اور پاکستان سے متعلق ہر عمل اور ہر قدم میں پیش پیش ہونگے۔ ملکی سکیورٹی صورتحال کو بہتر بنانے کی کوشش کی قدر کرتے ہیں۔ چند عناصر اسلامی نظریات و قوتوں کو نشانہ بنا رہے ہیں۔ حکومت نوٹس لے۔لاہور سے خصوصی نامہ نگار کے مطابق وفد میں محمد اویس نورانی، مولانا محمد احمد لدھیانوی، مولانا فضل الرحمان خلیل، قاری محمد یعقوب شیخ، میاں محمد اسلم، مولانا سید یوسف شاہ، اجمل خان وزیر، مولانا حامد الحق حقانی، مولانا یونس قاسمی اور دیگر شامل تھے۔ مولانا سمیع الحق نے کہا کہ ان حالات نے دینی قوتوں کا پیمانہ صبر لبریز کر دیا ہے اور دانستہ ہر محاذ پر دیوار سے لگانے کی سازش کی جارہی ہے جبکہ دینی حلقوں نے ہمیشہ ملکی دفاع، سلامتی اور استحکام کے لئے مسلسل مثبت کردار ادا کیا ہے مگر اب انہیں سڑکوں پر نکلنے پر مجبور کیا جا رہا ہے۔ وزیر داخلہ نے کہا کہ فورتھ شیڈول میں شامل کسی فرد کے ملک سے باہر جانے پر کوئی پابندی نہیں ہو گی۔ سمیع الحق نے افغان مہاجرین کی واپسی اور ان کو درپیش مشکلات کے بارے میں تفصیل سے آگاہ کیا۔ اور کہا کہ حکومت کی غلط پالیسیوں سے بھارت کو فائدہ پہنچے گا اور بھارت اس کوشش میں ہے کہ افغانستان اور پاکستان کے تعلقات خراب ہوں۔ آن لائن کے مطابق وزیر داخلہ نے اہلسنت والجماعت کے سربراہ محمد احمد لدھیانوی کا شناختی کارڈ بلاک کرنے پر معذرت کی۔