آرمی چیف کی ملاقاتیں، پاکستان کی قربانیاں تسلیم کرتے ہیں، تعاون بڑھائیں گے: آسٹریلوی قیادت

خبریں ماخذ  |  ویب ڈیسک
آرمی چیف کی ملاقاتیں، پاکستان کی قربانیاں تسلیم کرتے ہیں، تعاون بڑھائیں گے: آسٹریلوی قیادت

 آرمی چیف جنرل قمر جاوید باجوہ نے کہا ہے کہ پاکستان اور آسٹریلیا کے درمیان دفاعی شعبے میں تعلقات کے فروغ سے تعلیم اور سرمایہ کاری کے شعبوں میں تعاون میں اضافہ ہوگا جبکہ آسٹریلیا کی سول وعسکری قیاد ت نے دہشت گردی کیخلاف جنگ میں پاکستان اور پاک فوج کے کردار اور قربانیوں کو سراہا ہے۔آئی ایس پی آر کے مطابق چیف آف آرمی سٹاف جنرل قمر جاوید باجوہ نے اپنے سرکاری دورہ آسٹریلیا کے دوران سول اور عسکری قیادت کے نمائندوں سے ملاقاتیں کیں۔ آرمی چیف نے آسٹریلیا کی سینیٹ کمیٹی برائے خارجہ ودفاعی امور کے حکام سے بھی ملاقات کی ۔ کمیٹی کے سربراہ ڈیوڈ فاسیٹ بھی ارکان کے ہمراہ تھے۔ پاک فوج کے سربراہ کی آسٹریلین چیف آف ڈیفنس سٹاف ایئر چیف مارشل مارک بنسکن سے بھی ملاقات ہوئی۔ اس موقع پر سیکرٹری ڈیفنس گریک موریارٹی اور ایئر چیف ایئر مارشل کیون ڈیویزبھی موجود تھے۔ آرمی چیف جنرل قمر جاوید باجوہ نے جوائنٹ آپریشنز اور پلاننگ ہیڈکوارٹرز کا بھی دورہ کیا۔ انہوں نے آسٹریلین سٹرٹیجک پالیسی انسٹیٹیوٹ اور آفس آف نیشنل اسےسمنٹ کے دورے کے دوران تبادلہ خیال کیا۔ آسٹریلیا کی سول اور عسکری قیادت دونوں نے دہشت گردی کیخلاف جنگ میں پاکستان کے کردار اور کامیابیوں کو سراہتے ہوئے پاکستانی قوم اور فوج کی قربانیوں کا اعتراف کیا اور تعاون مزید بہتر بنانے کی یقین دہانی کرائی جنرل قمر جاوید باجوہ نے کہا وہ پاکستان کیلئے آسٹریلیا کے خیر سگالی جذبات اور دو طرفہ تعلقات کے فروغ کی خواہش پر ان کے ممنون ہیں۔پاک فوج کے سربراہ نے کہا کہ دونوں ممالک کے درمیان دفاعی شعبے میں تعلقات کے فروغ سے مستقبل میں بالخصوص تعلیم اور سرمایہ کاری کے شعبوں میں تعاون کو وسعت ملے گی۔