منی لانڈرنگ بھارتی فنڈنگ کیس :فاروق ستار مصطفـی کمال ارشد وہرہ سمیت بڑے ناموں انکشاف

کراچی(این این آئی)منی لانڈرنگ اور کراچی میں دہشتگردی کیلئے بھارتی فنڈنگ کے مقدمے میں مزید انکشافات سامنے آئے ہیں۔ بینک اکائونٹس کی مجازاتھارٹی میں فاروق ستار، مصطفی کمال سمیت اعلی قیادت کے ناموں کا انکشاف ہوا ہے۔تفصیلات کے مطابق بانی ایم کیو ایم کیخلاف منی لانڈرنگ کے مقدمہ میں 13 جوائنٹ بینک اکائونٹس کی مجازاتھارٹی میں بڑے نام سامنے آئے ہیں، انسداد دہشت گردی عدالت میں رپورٹ پیش کردی گئی ہے۔تحقیقاتی رپورٹ کے مطابق منی لانڈرنگ کیلئے13جوائنٹ بینک اکائونٹس استعمال ہوئے جو عزیز آباد کے نجی بینکوں کی مختلف برانچوں میں کھولے گئے تھے، جس میں ایم کیو ایم پاکستان کے سربراہ ڈاکٹر فاروق ستار، پی ایس پی چیئرمین مصطفی کمال، ڈپٹی میئر کراچی ارشدوہرا سمیت اعلی قیادت کے نام شامل ہیں۔یہ انکشاف بھی ہوا کہ مذکورہ اکائونٹس ایم کیوایم، کے کے ایف، سن اکیڈمی کے نام پرکھولے گئے۔ اس کے علاوہ نذیرحسین یونیورسٹی اور طارق میر کے نام پربھی اکائونٹ ہیں۔رپورٹ کے مطابق 13 میں سے ایک اکائونٹ ختم اور 4غیر فعال ہیں۔ ان بینک اکائونٹس میں فاروق ستار،مصطفی کمال، ڈپٹی میئر کراچی ارشدوہرا دستخط کرنے کے مجاز رہے جبکہ بابرغوری، رئوف صدیقی، خالد مقبول صدیقی کے نام بھی رپورٹ کا حصہ ہیں۔تفتیشی ذرائع کے مطابق بڑے ناموں کے سامنے آنے پر تفتیش کادائرہ بھی بڑھائے جانے کا امکان ہے۔ تفتیشی ذرائع نے بتایاکہ ڈپٹی میئر ارشد وہرا کا نام مقدمے سے نکالنے کا تاثرغلط ہے۔