آرمی پبلک سکول پشاور پر حملے میں ملوث مزید 2دہشتگردوں کو پھانسی دےدی گئی
راولپنڈی(صباح نیوز) آرمی پبلک اسکول پشاور پر،کئی بے گناہ شہریوں اور پولیس اہلکاروں پر حملوں میں ملوث فوجی عدالتوں سے سزایافتہ مزید 2 دہشت گردوں کو پھانسی دے دی گئی ہے۔پاک فوج کے شعبہ تعلقات عامہ آئی ایس پی آر کے جاری کردہ بیان کے مطابق فوجی عدالتوں سے سزا یافتہ 2 دہشت گرد عطا اللہ ولد محمد سلطان اورتاج محمد ولد الف خان کو پھانسی دے دی گئی ہے۔ دونوں دہشت گردوں کا تعلق کالعدم تحریک طالبان پاکستان سے تھا۔آئی ایس پی آرکے مطابق دونوں دہشت گرد آرمی پبلک اسکول پشاور پر حملے کے علاوہ کئی بے گناہ شہریوں اور پولیس اہلکاروں پر حملوں میں بھی ملوث تھے، عطا اللہ اور تاج محمد نے مجسٹریٹ اور ٹرائل کورٹ کے سامنے اپنے جرائم کا اعتراف کیا تھا۔واضح رہے کہ آپریشن رد الفساد شروع ہونے کے بعد فوجی عدالتوں سے سزا پانے والے دہشت گردوں کو ان کے منطقی انجام تک پہنچانے کے عمل میں تیزی آئی ہے اور اب تک درجنوں دہشت گرد پھانسی کے پھندے پر لٹکائے جاچکے ہیں۔