کانسٹیبلری کرپشن کیس،8ملزموں کی ضمانت خارج
ملتان (سپیشل رپورٹر) سپیشل جج اینٹی کرپشن ملتان نے پنجاب کانسٹیبلری کرپشن کیس میں ملوث 8 ملزموں کی ضمانت خارج کرنے کاحکم دیاہے جبکہ موقع سے صرف ایک ملزم کوگرفتار کیاجاسکاہے۔فاضل عدالت میں ملزموں محمدارشد، ذوالفقارعلی ،محمدشفیع ،محمدشفیق ،منیرا حمد،حنیف شاہد،لیاقت علی اوررشیداحمدنے درخواست ضمانت قبل ازگرفتاری دائر کی تھی کہ اینٹی کرپشن ملتان میں پنجاب کانسٹیبلری اوراکاؤنٹس دفتر کے ملازمین کی ملی بھگت سے افسران کے جعلی دستخط کرکے بوگس ملازمین بھرتی کرنے اورجعلی بل نکلواکرسرکاری خزانے کوکروڑوں روپے کانقصان پہنچانے کامقدمہ درج کیاگیاہے جبکہ وہ بالکل بے گناہ ہیں اوران کامقدمہ سے کوئی تعلق نہیں ہے اس لئے ضمانت پررہاکرنے کاحکم دیاجائے۔دریں اثناء استغاثہ کے مطابق ملزموں کے خلاف ناقابل تردیدثبوت موجودہیں اوران پر الزام ثابت ہوچکاہے اس لئے ملزم ضمانت کے حق دارنہیں ہیں جس پردرخواست گذارملزموں کی ضمانت خارج کردی گئی جس پرمذکورہ ملزم موقع سے فرارہونے میں کامیاب ہوگئے جبکہ صرف ایک ملزم رشیداحمدکواینٹی کرپشن نے موقع سے گرفتارکرلیاہے۔