پنجاب میں 50 فیصد کسانوں میں امدادی پیکیج تقسیم کر دیا: فرخ جاوید
لاہور (نیوز رپورٹر) صوبہ پنجاب مثالی کسان پیکج کے ثمرات کسانوں تک پہنچانے میں سبقت لے گیا ہے۔ پنجاب میں 50 فیصد کسانو ں کو امداد فرا ہم کر دی گئی ہے اوریہ عمل مکمل شفافیت کے ساتھ جاری رہے گا۔ چاول اور کپاس کے چھوٹے کاشتکاروں کے نقصان کی تلافی کیلئے 40 ارب روپے صوبہ کے 12لاکھ سے زائد کاشتکاروں میں تقسیم کئے جا رہے ہیں۔ چھوٹے کاشتکار5000 روپے فی ایکڑ امداد کی اس رقم سے گندم کی فصل کیلئے بھرپور زرعی لوازمات خرید سکیں گے۔کسان پیکج مشکل کی گھڑی میں زراعت کیلئے آکسیجن کا کام کرے گا اور مثالی امداد کے ڈرپ لگنے سے کسان اپنے پیروں پر کھڑے ہوں گے۔ ان خیالات کا اظہار صوبائی وزیر زراعت ڈاکٹر فرخ جاوید نے آج یہاں کسان راہنماؤں کے وفد سے ملاقات میں کیا۔ انہوں نے کہا کہ زراعت ہماری ریڑھ کی ہڈی ہے لیکن پاکستا ن کی تاریخ میں ایسے مثالی پیکج کی کوئی دوسری مثال موجود نہیں۔انہوں نے کہا کہ341ارب روپے کے اس مثالی پیکیج کے ثمرات پنجاب میں 600ارب سے بھی زائد محسوس کئے جائیں گے۔ انہوں نے بتایا کہ صوبہ کے 23 ہز ار 800 دیہا تو ں میں ترقی پسند کاشتکاروں کو کو الٹی سیڈ گندم کی 92 ہز ار بوریاں مفت تقسیم کی گئی ہیں یہ کاشتکار فصل اُگانے کے بعد دوسرے کاشتکاروں کو بیج دینے کے پابند ہونگے۔ حکومت پنجاب کاشتکاروں کو 30ہزار ٹریکٹر بھی دیئے اور ڈیزل اور سولر ٹیوب ویل پر بھی سبسڈی دے رہے ہیں۔ انہوں نے بتایا کہ 150ارب روپے کے پنجاب دیہی روڈز پروگرام سمیت اربوں روپے کے متعددمنصوبوں پر کام جاری ہے۔ انہوں نے کہا کہ اس پیکج سے یوریا کھاد کی فی بوری کی قیمت میں 500 سے 700 روپے کمی واقع ہوئی ہے۔